عاجل جدا جدا جدا جدا

حصلت هوانداي عدسة زي الي عندنا في ليبيا بس مقطومة (يعني هاتش باك). طبعا الي في ليبيا اكثر من ممتازات بس مش عارف الي هنا شن وضعهن هل هن نفس الجودة. موديلها 2006 وماشية اقل من سبعين الف وسعرها 7000 دولار. مش عارف اذا فيه حد جربها هنا ام لا من الشباب بالله يقوللنا.
وكذلك فيه هونادي جيتس (Hyundai GETZ) اصغيرات وباب واحد طبعا بس انا اول مرة انشوفها. استغربت انها موديل 2009 وماشية 15 الف وسعرها معقول نسبيا يعني في جو التسعة ونص.
بالله الي عندا فكرة اكيده عن هالنوعين من السيارات هنا في استراليا يفيدنا وتفضلوا بقبول فائق شكري.

السلام عليكم
أغلب الاخوة الليبيين في استرالياسياراتهم كورية الصنع وجودتهم جيد حسب العمر و خويك حصل سيارة كيا موديل 2003 هتشباك بسعر 2800 و ماشية 152000 كم و الحمد لله السيارة جيدة جدا , لكن ليها تقريبا عشر ايام عاطلة بسبب خيط الفاصل أثر على الديسكو فرسيوني و الروجسبينته . و لغلا استراليا بعثوهن لي من ليبيا. من المفروض أن تبحث عن ميكانيكي عن طريق الشباب و يعطى رايه في السيارة أو أحد الشباب الذين لهم دراية يالسيارات . و أن شاء خير
السلام عليكم

السلام عليكم


اخي الكريم اذا كانك بعائله فنصيحة اخ امشي على روحك بالشوي واشري سيارة رخيصه دور ان شاء الله تلقى حاجه رخيصه وكويسه
لان الواضح انك جاي جديد وممكن افلوس السلفه والعمليه مازالت مبحبحه ( * * )
وممكن ما تلاقيتش مع حد عنده عائله بيش يوضح لك
ممكن الاخ ابو ايمان قال لك بطريق غير مبااشره ان
المبلغ هذا كبييييييييير على الموفد الليبي بعائلته لانه راح يحتاج لها السلفه
مجرد نصيحه والله اعلم


والسلام

السلام عليكم
اخي عبدالله بصراحة أذا كانت حالتك المادية في ليبيا جيد جدا و غير متعود على السيارات المستعملة فذلك يعود اليك . أما اذا كانت حالتك احسن من حالتي مثل ما ذكر الاخ عاشق العظمى ان شاء الله تجد سيارة مناسبة و سعرها معقول . يا راجل في ليبيا سيارة داوو و بالذات السيلوا وصلت 500.000 كم و مازال متحملة . كانك عابي على السلفة بين شهر أو شهرين تكمل و 7000 الاف دينار بصراحة قيمة كبيرة . بالله يا عبدالله وين بتمشي بيها. من البيت للجامعة . أو السوق . هذه اغلب مشاوير السيارة في استراليا و الحمد لله اغلب الشباب سياراتهم 100% ألا شخص واحد بس . و في النهاية يا أخي انت أدري بنفسك و لا أريد أن اكون مزعج لرغباتك و لرغبات الجميع . لآن كل شخص أدرى بنفسه .
السلام عليكم