حوار بين الشاعر و جداه التي تعالج بالطب الشعبي

من طرف autopsy الأحد يناير 25, 2009 2:13 am

تفهم جدايا في الطب **دنيا وعجب *** ودكتورة من غير كتب

قالت جدايا ** نا عمري ماعرفت قراية
ولاحاجة سماها محاية **ولابيرو بالحبر يصب
ولاكراسة ولا براية**ولامعمل فيه تجارب
ولا قعمز طالب بحدايا** سمايا مانعرف نكتب
هدايا من العالي مولايا **دوايا راسي ومجرب
العيل اللي فيه العواية**نزازيه ويمشي يلعب

************************************
قالت مانعرف صورة **ولانعرف طب وتنتورة
لادمال ولاباسوره***لا أماس جراحة تلعب
ولانوقف فوق السبورة**باش نكتب سامي ورجب
العيل اللي رجله مكسورة**نجبرها تجبير عرب
نداويه ويمشي في شورة **ويبري كان الله كتب
***************************************
قالت مانعرف آله (السماعة)***بتلزمني في تشخيص الحالة
نا دوايا كل شيء قبالا ***بشوية حاجات مركب
مريضي بنجيبله العالة ***نولع في الكانون حطب
كان بطنه تجري سيالة *** بنطبخله براد عشب
ولانقوله برا ولا تعالا ** ولا ولى تالي واتعب
**************************************
قالت نا مريضي يشفى ***لا سبيتار ولا مستشفى
ولا اشعة تنزل في كشفه *** ولا وصفة ليه بنكتب
ولا شروبوا ياخذ بالرشفة ** ولا حبوب علي ثلاث وجب
نسبب ونداوي لين يشفي *** كان غير بي يرحب
*******************************************
قالت نا جداك ذكية***ولا شيخ ضربني علي يدية
ولاحاجة سماها كلية ***ولاعطتني الأبلة واجب
نداوي في حاجة رسمية ***بنوصفها عنك تصعب
اللي عنده مرض الصدرية ***جغوم حلبة لازم يشرب
دوا اللي عنده حالة نفسية ***عسل مع كسبر ذايب
********************************************
قالت نا جداك مرتاحة ***ولانطلب قرض ولاراحة
ولامدير في كل صباحة***يسجل في من هو غايب
ولانخدم كيف الطلفاحة *** نتغشش كان قصوا الراتب
نقولهالك بكل صراحة** إنت جيلك هذا يشيب
******************************************
الشاعر ماعجباش الكلام اللي قالاته جداه علي جيله ...فرد عليها :

قلتي لين وصلتي حدك***وخليتك قلتي ماسدك
ياجداى يزيه نكدك*** نا جيلي ماهو سايب
جيلي واقف للي ضدك *** من العيب تقولي خايب
وجيلي من المصنع بيمدك **بحليب حكاك معلب
*************************************
الجدة :

نا حليبك مانضوقه ***ولاني لحليبك محقوقة
حليب خامر قاعد في سوقه***عليه زحمة ودفان وقب
ونا سلم عنزي المطلوقة ***بيديا هاذم نحلب
لبني كيف المسك نشوقه***مالي الحلابة رايب
************************************
الشاعر :
قلها لبنك ياجدة ***باسل صامت مايتعدي
بيدير الفدة *** قارص صامت زي الشب
عنك بنرده ***تحشمت لقيته صاعب
*********************
الجدة : إنت ترد بقر وتدير أكبر ...ليش

لأنك جيل بلاعقيدة ***وجيل معادي أمه وسيده
والسبسي ديمه في إيده***راقي دخانه يعسلب
تي والله لوفيه جريدة *** تو تولي وتتأدب
**********************************
الشاعر :: أيام الضرب بالجريدة والعصا اللي تحكي عليها هاذي راحت ...

اليوم جيل جيل الحرية *** وكيف الراجل كي الولية
اليوم تمشي وين تبي هية ** تقضي في السوق وتحسب
ووخيك قاعد بالذرية **** ساعات غذاها يطيب

***************************
الجدة :

طيح سعدك و مزالك ** ماصح خيالك
تي من هو بهالدوة يابالك ** عادات جدودك تقلب
جدك لو يسمع بأفعالك *** ماعاد عليك بينشد
*************************************
الشاعر :
جدي شيباني ***موديله من عام الهاني
يقعاده في كرعيه يعانى
مريض بيرقد من المغرب

*************************
الجدة :

جدك موديله ****ماتلقي في البر مثيله
غير شن طاريله *** يروح من السوق يكعب
غير عاد في ليله ** ماعادش فية يطرب
****************************
الشاعر :

عاد ماك طبيبة **** شوفي موضوعه وسريبه
ومن بعد الغيبة *** ياريت الملقي يقرب
وسمحولي ياأهل الطيبة**ساعات الواحد يكذب
وتفهم جدايا في الطب ***دنيا وعجب ودكتورة من غير كتب

من طرف عمر الساكت الأحد يناير 25, 2009 2:41 am

رائع وطريف هذا الحوار...كان اول شئ قراته هذا الصباح.....أضحكني.....لكنه جعلني انظر الى الكتاب الذي امامي واتساءل ليت هذه الجدة لديها طريقة أيضا لتعلم اللغة الانجليزية بدون كتب أو معهد أو غير ذلك.....ترى هل لدى الجدة دبارة تجعل التحصيل أسهل؟ تحياتي للجدة...

من طرف **مدير المنتدى** الأحد يناير 25, 2009 10:50 am

مشكور أخي على هذه الأبيات الطريفة ......... واصل عطاءك و لا تحرمنا

من طرف **OTHMAN ABU SBIE** السبت فبراير 28, 2009 2:03 pm

مشكور اخى autopsyوووووو ياريت نرجع زى زمان

من طرف eng control الأحد نوفمبر 22, 2009 11:15 pm

مشكورمشكورمشكورمشكورمشكور مشكورمشكورمشكورمشكور
مشكورمشكورمشكورمشكورمشكور مشكورمشكورمشكورمشكورمشكور
مشكورمشكورمشكورمشكورمشكور مشكورمشكورمشكورمشكورمشكور مشكور
مشكورمشكورمشكورمشكورمشكور مشكورمشكورمشكورمشكورمشكور مشكورمشكور
مشكورمشكورمشكورمشكورمشكور مشكورمشكورمشكورمشكورمشكور مشكورمشكور
مشكورمشكورمشكورمشكورمشكور مشكورمشكورمشكورمشكورمشكور مشكور
مشكورمشكورمشكورمشكورمشكور مشكورمشكورمشكورمشكورمشكور
مشكورمشكورمشكورمشكورمشكور مشكورمشكورمشكورمشكور
مشكورمشكورمشكورمشكورمشكور مشكورمشكورمشكور
مشكورمشكورمشكورمشكورمشكور مشكورمشكور
مشكورمشكورمشكورمشكورمشكور مشكور
مشكورمشكورمشكورمشكورمشكور
مشكورمشكورمشكورمشكور
مشكورمشكورمشكور
مشكورمشكور
مشكور
على هده الابيات الجميلة