سلامي علي الابطال في مصراتة

(الف تحية للابطال في مصراتة واجدابيا والزنتان وككلة ويفرن ونالوت وكل بلادي واتمنى النصر القريب ويامصراتة نالقانك خطيتي تاريخ جديد والزنتان والجبل الغربي وكل ليبيا منورين الله ينصركم)



سلامي علي الابطال في مصراتة
اشداد العزايم يرضخو هيهاته

سلامي ليهم
سلام عز من برقة الي اتحييهم
هلنا ونحنا واخذين عليهم
تاريخهم السنين ما محياته
ايدينا علي الاقدار جن في ايديهم
وخضنا احروب ضروس لها جولاته
وبرقة اللي بعدت علي ماشيهم
جتهم مسارح للشهيد وباته
داروا اللي يكدر بها غازيهم
لي منصفر وجهه كثر عاراته
نطريك علي ف السماء طاريهم
كيف المنار امصوقرة ضيّاته

نطريك علي صار
في وقتنا توا اقصص اكثار
مصاريت هبوا شيبهم واصغار
قالوا الظلم اقلوبنا رفضاته
الطاغي اللي جاء يستحي ف الدار
وجاب الغريب امسلح ابقهراته
ننفوه ولو راح الدما قطّار
ولو راحن اجيال ولا تكون نجاته
شرف الخسيس ايهونله ف نهار
وعمر الوفي ايهون في حسباته
ان جيتهم غازي ايجو ثوّار
كبير الهمايم ترفعه سيماته

كبار الهمّه
حتى الصغير ف نجعهم يسمّى
رفضوا يكونوا مع خسيس الذمّه
يهودي امستّر في ظلام عباته
سبّب نكد شعبه وجاب الغمّه
ايريد يحكم العربان هو وضناته
قتل الحريم وطفل سيّح دمه
يحساب تمشي عملته بنسياته
وربي اعزاز الوطن صخرة صمّه
ياما انكسرن فوقها جيشاته
ودورك ايجي تو تنكسر يارمّه
بعينك اتشوف الوطن حره ذاته

سلامي علي الابطال في مصراته
اشداد العزايم يرضخو هيهاته


يادم اطوير
بنغازي