رسالة الي كل من يساند القذافي واعوانه

شكرا يا أختي نورهان على هذا الفيديو المؤثر، أني أدركت للأسف أن القردافي قد نجح جزئيا في كسب وتحريض بعض القبائل على بعض كما هدد ابنه، وبالذات ورفلة وترهونة بدون تعميم، وهذا هو سبب تأخر النصر، المشكلة هذيم تغلب عليهم طبيعة القبلية وحمية الجاهلية، وايتبعوا في شيابينهم وأهلهم سواء على الحق أو على الباطل بدلا من ايوعوهم ويرشدوهم للحق، ويتهموا في أنه الشرق يبوا يمسكوا البلاد ابروحهم، ونسوا مصراته والزاوية وزوارة والجبل الغربي وحتى طرابلس وتاجوراء، ومتأكد الأغلبية في المدن كذلك.

على سبيل المثال صاحبي الترهوني أكدلي أنه أمس في زحمة طوابير على المصارف بعد أن أغراهم اليهودي بمال الدنيا الزائف وأغدق عليهم القروض والسيارات، والمسخرة أنه أمه في ترهونة معاش اتكلم في بنتها اللي في بنغازي، عليش؟ لأنه زاعله على القذافي واتموت فيه تواه عكس بنتها!، الناس الكبار هذيم شيبيفهمهم مساكين كنهم ليهم 41 عام معاه، يتفرجوا على قناة القنفود وايتبعوا في بعضهم.

الشيء المضحك والمحزن في نفس الوقت أنه في طالب ورفلي معاي كاين في البداية متحسر ومش راضي على القذافي، فرح أنه سمع قبيلته طلعت مظاهرات، لكن للأسف طلعت مع وليس ضد القردافي، طبعا هذا كله منظم من الكلاب الثورية لأنه ورفلة عندهم تاريخ دامي مع القردافي، لكن بعد أسبوع سمعت أنه يدعم في القذافي علنيا وقدام حتى الأساتذة اللي مشغولين علينا، وبدون ما يكون عنده أي تقدير للأرواح الليبية التي أزهقها هذا السفاح، أني انقول لو تسمع به الحكومة الأسترالية ايلزوه لأنه للأسف هم عندهم إنسانية أكثر منه اللي داير روحه ليبي.

عموما أبحث في الفيس بوك على لقب الورفلي وحتلقى كثير من الأشكال اللي يتباهى بصورة هالسفاح في خلفياتهم. وأترككم مع حوار غير مجدي مع أحد هؤلاء النماذج اللي طبع الله على قلوبهم , وما زال يتشدق بحرمة المظاهرات بدلا من أنه يجرم السفاح، علما بأنه طالب عادي حسب قول صاحبي :


Hattem
لا حول ولا قوة إلا بالله مازلت اتدافع على القذافي واتدورله في حجج واهية, كنك شيخ من الشيوخ أفتو عليه سيدك القردافي هذا، لكن انت تمثل قلة من ورفلة العميلة ميتة الضمير خائنة للشعب الليبي الحر

Ahmed Alwerfaly
الا ترى أن الأمر قد حسم وأن المفسدة التى جناها الأخوة فى المنطقة الشرقية أكثر من المصلحة المرجاء وأنتم تهيجون وتحرضون الأخوة على الباطل , أنا لا أمثل إلا نفسى لا أمثل لاقلة ولا عدة ولكن الدى أتضح لدي بأنة رأي الاغلبة الساحقة من ابناء قبيلة ورفلة.

Hattem
هذه المشكلة، القردافي نجح في تصوير أنها حرب قبلية، وأنها محصورة في الشرق، كيف نسيت مصراته والزاوية وزوارة والقتل اللي صار في تاجوراء وطرابلس، ولا تحضر في قناة القنفود وبس؟!!
وكان الأمر حسم للقردافي، أني انقول في كلمة الحق وما انميلش مع القوة الطاغية، القردافي لو غلب هذا بسبب التواطؤ للأسف من بعض القبائل اللي أغراهن بالفلوس وضللهن بالإذاعة
مشكلة ورفلة وترهونة أنهم كأنهم مش ليبيين ما تقربش لحمتي وبس، نسيت التقتيل اللي صارلكم في 93 مانه
وبعدين كيف اتقول أنها مفسدة، من هو الفاسد اللي وقف سلميا في الشارع ينادي بحقوق ومساجين، ولا اللي قتل بالبلطجية، هو أرادها حربا فلتكن حربا، هذا درس للقردافي أنه دم الليبيين ما هوش بلاش وأغلى بواااااااجد من دمه هو الجرثومة، والمرة الجاية ايفكر ألف مرة قبل يتجرأ.
ويا رب ايكون تشاؤمك غلط، وربي ناصرنا على كيد ولد اليهودية الطاغي

Ahmed Alwerfaly
ما بني على باطل فهو باطل , المظاهرات السلمية وغير السلمية محرمة لأن المفاسد التي جنتها أكبر من المصالح والدليل أمامنا فى ليبيا وهدا قول العلماء وليس بقولي.

Hattem
المفاسد كلها جاية من رأس الفساد الكبير القردافي، لو عندك قريب محبوس لعشرين سنة ما تندريش عليه وبعدين يطلع بريء ولا قاتلينه بدون حتى محاكمة بعدين تفهم زين.
للأسف انت تمشي مع القوي ولو كان فاسد، وتتمسك بفتوى شيخ واحد من دون الأخرين طايحه صلاحيتها

Hattem
بعدين فكنا من الفتوى وقول انت اللي صح، تو انتا كلامك معناها يستاهلوا المتظاهرين الإبادة هذه!
حتى القاتل يا حبيبي ايشدوه وايحاكموه قبل ما يعدموه، والسارق ايحاكموه ويحبسوه، لكن على كلامك اللي يوقف في الشارع وايقول لا للقذافي يضربوه بصاروخ في الرأس وقتي. يا للعجب!
كبر عقلك وشوف الجرائم اللي بلا حساب، حتى الجريح في المستشفى ما هنوشي وسرقوه، نبي نعرف بجدياتك ولا اتماطل؟؟؟؟

Ahmed Alwerfaly
أعتقد أن الشيخ أبن باز والعثيمين وألالباني من علماء هده الامة ومشهود لهم بالعلم والخير رحمهم الله وما أجازو المظاهرات ,, وفى عصرنا الحاضر الشيخ صالح الفوزان والشيخ سليم الهلالي أحد طلبة الشيخ الالباني رحمة الله والشيخ ربيع المدخلي لم يجوز أحد المظاهرات.

Ahmed Alwerfaly
أنا أرى أنا الرابح فى هده المعارك خاسر.

Hattem
باهي غير فكينا من فتواك هذه، انقولوا هي المزبوطه حرام، رد على الكلام الأخيري، يستاهل كل من نزل الشارع القتل وقتي؟!!

Ahmed Alwerfaly
هده ليست فتواي إنما هى فتوي أهل العلم ولقد قلت لك مابني على باطل فهو باطل.

Hattem
بسم الله الرحمن الرحيم ((فإنّها لاتعمى الأبصار ولكن تعمى القلوب التى في الصدور))
والله شكلي انخاطب في ولد القذافي ابطوبته أني.
خلاص المرة الجاية كنك غلطت ودرت أي حاجة حرام صغيرة ولا كبيرة ان شاء الله يا ربي تنقتل في مكانك، ووصي هلك يرضو ويقولوا : يستاهلها ما بني على باطل فهو باطل
الحق بين والباطل بين