عاجل عن القرار 628 ارجوا المعلومة الاكيدة

السلام عليكم , اود الاستفسار عن مدة القرار 628 وهل فعلا يوقف فى 12 لان الامر يهمنى للغاية فقد تاخرت فى انهاء
اجرآتى بسبب المرافق والذى سيكون الوالد انشاء الله . علما بان آخر اجرآء قمت به هو الحصول على القبول .
عليه ارجوا ممن لديه المعلومه الاكيدة ان يفيدنا لانى فعلا بحاجة للتاكد بهذا الخصوص حتى اكمل اجرآتى وانا مطمئنة .
وشكرا لكل

السلام عليكم ورحمة الله وبركاته
هذه المعلومة صحيحة بأذن الله لان الدكتور الغرياني في الندوة اللي صارت في جامعة الفاتح في شهر 1 اللي فات قال انه القرار ساري المفعول الى نهاية شهر 12 -2010 هدا بعد ماكان سينتهي في شهر 5
ولكن حاولي ان تسألي ادارة البعثات بهذا الخصوص لانهم ماشاء الله كل اسبوع بقرار مرات استجدت اشياء واحني ماندروا عليها
اتمنى لك التوفيق

والله يا اختى ربى ايسهللك بس اهم حاجه انك تسرعى فى الاجرااءات وتقدمى عالتاشيره او قدمى على دوله عربيه واجراتها سهله

ربى يوفقك

شكرا للاهتمام وسرعه الرد واتمنى التوفيق لجميع الاخوات ,
اختى ام محمد انشاء الله تسهل الامور. على الاقل يمدو فترة القرار خصوصا ان فيه كثيرين من نفس القرار مازالو ما طلعوا خاصه هنا فى الشرق . اما بالنسبه للدراسه فى دولة عربيه اختى كوكا صعب شويه لان تخصصى لغة انجليزيه وانتى ادرى اللغة ما تتاخذ الا من هلها ونضرا لتخصصى فالساحات محدودة بريطانيا مغلقه, امريكا مانصحونى بيها واهلى ماشجعونى للدراسه فيها, فكرت فى مالطا بعدين اغلقوها.عليه استرالياهى الحل. وان كانت نصيحتك فى محلها.
التفاح الاخضر شكرا على الدعوة والله جت فى وقتهاوانا ايضا اتمنى لك ولكل الاخوات كل التوفيق وشكرا وجزاكن الله كل خير.

السلام عليكم
انا اسفة اختي الكريمة ومش قصدي نحبط ماعنوياتك لاني عشت هاللحظات لما قالولي القرار بينتهي في شهر خمسة واني كنت نستنى في التاشيرة لكن الحمد لله مشيت الى ادارة البعثات وقالولي انه في نهاية 12 ان شاء الله ربي يسر امورك ويفتح الطريق قدامك وياريتك من اول مرة مشيتي للغرياني وكلمتيه وشرحتيله ظروفك لكان احتمال افتحلك طريق بريطانيا لاني نعرف هلبة ناس خشوله ومشت امورهم مع ملاحظة انهم ماعندهمش واسطة خشوا كلموه بصفة انسانية وبس وحتى انتي توا اذا لاقدر الله ماكملتيش قبل 12 ننصحك تمشيله بنفسك وخودي معاك طلب تمديد المهم ماتيأسيش

نعطيك معلومة اني قعدت نستنى في التاشيرة مدت 7 شهور قدمت يوم 18-10 وصلتني يوم 19-5 شفت الياس والاحباط اللي ممكن تكوني انتي عايشاته حاليا
فلدلك اختي الكريمة انصحك بالصبر والتأني واتمنى لكي التوفيق ونشوفوك قريبا معنا في استراليا مع انها لاتستحق العناء اللي احنى بدلناه من اجل الوصول اليها

ربي يوفق الجميع انشاء الله