رحلتي لانهاء اجراءات الايفاد لدراسة بالخارج..

ans2010 كتب:

00

[ندعوك للتسجيل في المنتدى أو التعريف بنفسك لمعاينة هذه الصورة]

أولا أهني كل المتحصلين علي الإيفاد للدراسة بالخارج
وأقول لهم ( ألف ألف مبروك )

[ندعوك للتسجيل في المنتدى أو التعريف بنفسك لمعاينة هذه الصورة]

وأتمنى أن يكون فاتحة خير عليهم وبناء مستقبل مشرف
وأهم شي النتيجة

[ندعوك للتسجيل في المنتدى أو التعريف بنفسك لمعاينة هذه الصورة]

والآن نبدأ في مشوار تجهيز المستندات المطلوبة لتنفيذ قرار الإيفاد

بسم الله
قبل كل شي يجب علي الموفد معرفة مواد لائحة البعثات
1- قرار لائحة البعثات
[ندعوك للتسجيل في المنتدى أو التعريف بنفسك لمعاينة هذا الرابط]

2- قرار اللجنة الشعبية العامة بشأن تعديل وإضافة بعض الأحكام إلى لائحة الإيفاد
[ندعوك للتسجيل في المنتدى أو التعريف بنفسك لمعاينة هذا الرابط]

وبعد ما قريت اللائحة وعرفت اللي عليك واللي ليك نتوكوا علي الله ونبدوا ...
أولا : تمشي لإدارة البعثات الدراسية في منطقة عين زاره – الفرناج وتخش ( السلام عليكم ) وبوجهك طول لنافدة القبول وتقوللهم انك موفد للخارج بقرار رقمه (كدا) ورقمي التسلسلي (كدا) وطبعا انت تكون نبه ومفتح تبدأ مجهز صورة من القرار طبعا مش كله ، الصفحة الأولى والصفحة اللي فيها اسمك وصورة من جواز سفرك العربي + الانجليزية تعطيهملهم ويعطوك نموذج تعبيه وتحددلهم الساحة ( البلاد ) اللي تبي تقرا فيها وتوقع تعطيهولهم ويقولولك راجعنا يوم ( كدا )وإذا كان قرارك صادر عن الجامعات أو جهات عامة يقولولك راجع منذوب الجهة اللي مرشحاتك أو الجامعة اللي مرشحاتك .

المهم خلينا في الجماعة اللي عندهم مندوب نزل النماذج هذي خليها عندك هيا المفروض يعطيهالك المندوب بس أنا مجهزهالكم ديجيتال .

1- نموذج لغرض القبول .
[ندعوك للتسجيل في المنتدى أو التعريف بنفسك لمعاينة هذا الرابط]

2- نموذج لغرض التأشيرة .
[ندعوك للتسجيل في المنتدى أو التعريف بنفسك لمعاينة هذا الرابط]

3- طلب الحصول علي تذاكر السفر .
[ندعوك للتسجيل في المنتدى أو التعريف بنفسك لمعاينة هذا الرابط]

4- التأمين الصحي .
[ندعوك للتسجيل في المنتدى أو التعريف بنفسك لمعاينة هذا الرابط]

أول حاجة تعبي نموذج لغرض القبول وتوقع عليه وتعطيه للمندوب وترفق معاه صورة من جواز سفرك العربية والانجليزية .
وبعد ما تاخد ورقة الدعم المالي تبدا فيها عاد وينك يا جامعات وهات ما عندك
طبعا جامعات معتمدة مش متع مشي حالك
المهم في الوقت اللي تراسل فيه الجامعات وتستنى في القبول الأكاديمي وقبول اللغة أقرى النقص وجهز المستندات المطلوبة للإيفاد .

نجو للمستندات المطلوبة
أول شي تجهز ملفين
واحد أصلي والثاني صورة من الأوراق الأصلية

[ندعوك للتسجيل في المنتدى أو التعريف بنفسك لمعاينة هذه الصورة]

والمستندات هي :
1. المؤهل العلمي وكشف الدرجات
2. شهادة الميلاد
3. صور من كتيب العائلة
4. صور من جواز السفر
5. شهادة الوضع العائلي
6. الوضع العسكري
7. قبول لغة وأكاديمي
8. إخلاء طرف
9. عقدكفالة
[ندعوك للتسجيل في المنتدى أو التعريف بنفسك لمعاينة هذا الرابط]

10. استمارةبيانات طالب
[ندعوك للتسجيل في المنتدى أو التعريف بنفسك لمعاينة هذا الرابط]

11. تعهدطالب
[ندعوك للتسجيل في المنتدى أو التعريف بنفسك لمعاينة هذا الرابط]

12. تأشيرة دخول دراسية

نبدو توا وحدة وحدة

بالنسبة للمؤهل العلمي وكشف الدرجات
أول حاجة تاخد شهادتك وكشف الدرجات وتمشي لمترجم قانوني واترجمهم عنده .
وبعدها تمشي لمركز ضمان الجودة في بن عاشور قريب من مصحة المختار

[ندعوك للتسجيل في المنتدى أو التعريف بنفسك لمعاينة هذه الصورة]

وتختم علي شهادتك عندهم ( طبعا لازم تكون معتمدة ) .
وبعد ما تختمها تمشي تصدق علي الترجمة في مكتب التصديق في الظهرة في جانب شركة الزويتينة وخلف فندق الودان ( سيدي عيسى )
وبعدها تمشي تختم علي شهاداتك في الخارجية في منطقة النوفليين .
وهكي تكون جهزت النقطة الأولى من مستندات تنفيذ قرار الإيفاد

نجو توا للباقي
تمشي تاخد كتيب العائلة وتمشي لمصلحة الأحوال المدنية ( السجل المدني لمنطقتك ) وتقدم في طلب شهادة بالوضع العائلي وشهادة إدارية إذا كان الكتيب ازرق ( القديم ) وبعد ما تاخدهم تطلع بوشك للمصور عدل تصور صورتين صورتين من ( كتيب العائلة شهادة الميلاد وجواز السفر والوضع العائلي والاقامة ) وبعدين تصور صور شخصية لوجهك الجميل .

[ندعوك للتسجيل في المنتدى أو التعريف بنفسك لمعاينة هذه الصورة]

وبعدين تعبي نماذج عقد الكفالة واستمارة بيانات موفد ونموذج التعهد

وتمشي لجهة العمل اللي تشتغل فيها تختم عندها استمارة بيانات موفد وبعدين تمشي لأمين المؤتمر لمنطقتك تختم عنده استمارة بيانات موفد ونموذج التعهد وعقد الكفالة وبعدين شوف أول محرر عقود معتمد تصدق عنده عقد الكفالة .
دوشة ووجع راس صح
الله غالب معليش هانت
يلا انكملوا .... يلا

بعد ما تجهز الملفين وتكون كملت موضوع القبول الأكاديمي وقبول اللغة
تعبي نموذج الدعم المالي لغرض التأشيرة وتوقع عليه وبعدين طول لعند المندوب وترفق معاه صورة من القبول الأكاديمي وقبول اللغة وصورة من جواز السفر العربية والانجليزية والوضع العائلي .
وبعدين تستنى وبعد ما تاخد رسالة الدعم المالي طول بوجهك لسفارة البلاد اللي بتمشيلها تقدم للتأشيرة وتراجي التأشيرة لين تصدرلك .
وتوا أبدى جهز في شناطيك للسفر

[ندعوك للتسجيل في المنتدى أو التعريف بنفسك لمعاينة هذه الصورة]

مازال مش من توا تمشي للمطار مازااااااااااااال

وبعد ما تصدر التأشيرة تقدم في التفويض وتعبي الطلب للحصول علي تذكرة سفر وتوقع عليه وتعطيه للمندوب وترفق معاه صورة من جواز السفر العربية والانجليزية وصورة من التأشيرة وما تنساش تعبي نموذج التأمين الصحي حتى هوا وتعطيه للمندوب
وبعدين تراجي حوالي مدة من شهر الى شهرين حسب الظروف وحضك
لما يوصل التفويض للمالية تقدملهم صورة من جواز السفر والتاشيرة ويعطوك الإبراق يسموا فيه 3نسخ
نسخة تقعد عندهم
نسختين يعطوهملك وحدة تخليها عندك والثانية تعطيهالجماعة البعثات ويقولولك راجعنا يوم ( كدا )
وبعدين تمشي ويعطوك مجموعةصور أوراق ( تعريف طالب ، إبراق من البعثات ، رسالة ربع المرتب إذا كنت من جهة عامة أو من الجامعات ) .
وبعدين تمشي للمحفوظات تعطيعم الأوراق يعطوك النسخ الأصلية من ( تعريف طالب ، إبراق من البعثات ، رسالة ربع المرتب )
وتوا هكي كملنا برنامج أوراق البعثات .
بعد ما تلقى اسمك في المالية تمشي تشري كندرة جديدة وتقعد ماشي جاي علي مبنى الوكالات وهو في نفس مبنى البعثات تشوف اسمك في القوائم المعلقة ولما تلقى اسمك تمشي للوكالة وتقوللهم لقيت اسمي في القوائم يشوفوا اسمك ويتأكدوا منه وعلي طول يعطوك نموذج تعبيه وبعدين يقولولك راجعنا يوم ( كدا ) لين يصدرولك التذكرة
وووووووووووووو بعدين تاخد تذكرة السفر
وعلي طول لم قشيشك وشناطيك وبوجهك للمطار
وماتنساش أمانة في رقبتك إدعي لي دعوة خير
ما تنساش ايوة ( دعوة خير )

فما أجمل الأخوة باالله ..نباتها <<< الصدق و أرضها<<< الإخلاص

[ندعوك للتسجيل في المنتدى أو التعريف بنفسك لمعاينة هذه الصورة]

موفقين بإذن الله تعالى
وسامحوني إذا كان طولت عليكم أو نقصت عليكم حاجة نسيتها
( جل من لا يسهوا )

نصيحة : راجع إدارة البعثات ديما لأن مرات يغيروا في اجرائاتهم .

[ندعوك للتسجيل في المنتدى أو التعريف بنفسك لمعاينة هذه الصورة]

00

اصيلة كتب: انا ملفي رفعه مندوب الكلية من فترة قبل ما نتحصل على القبول بس الاوراق كلها مترجمة ومختومة والاستمارة جاهزة وتعهد الطالب جاهز معاهم بالملف ؟؟

كيف احتي اصيلة رفعوا ملفك قبل الحصول على قبول ؟؟؟
انتي شنو الملف اللي عطيته ليهم .. قصدي علاش ؟؟ عشان التاشيرة او التفويض المالي ؟

تحياتي