المعيشه في ملبورن

السلام عليكم انا بادن الله مسافر بعد اسبوعين الي ملبورن ياريت حد من الاخوه في مدينه ملبورن يوصف المعيشه غادي والاسعار هل في متناول الجميع وهل المنحه كافيه لتلبيه المستلزمات والضروريات واتمني ان تعلموني بمبلغ المنحه علما باني متزوج وعندي 2 اطفال ولكم الشكر

السلام عليكم
المنحه موجوده في الجدول بالرابط التالي
[ندعوك للتسجيل في المنتدى أو التعريف بنفسك لمعاينة هذا الرابط]

سلام

توصل بالسلامة ان شاء الله
بالنسبة للمعيشة في ملبورن غالية شوية وخصوصا السكن وانت عندك طفلين يعني مش حتلقى سكن اقل من 300 في الاسبوع وخصوا اذا اردت ان تسكن في وسط المدينة , أما اذا اردت السكن خارج المدينة يمكن تلقى ارخص من هذا السعر لكن الفارق رح تدفعه في المواصلات , بالاضافة ان السكن خارج السيتي مش آمن يعني لما تمشي للجامعة يبقى بالك مشغول عالعائلة . لكن المنحة ان شاء الله تكفي لكن ماتقدرش توفر منها شي , يادوبك تكفي .
وان احتجت اي معلومة او خدمة من ملبورن تفضل .

السلام عليكم بارك الله فيكم علي هدا الرد والله انا اكتر حاجه نفكر فيها كيف نوصل بلله اللي مجرب قبلي انصحوني خاصه السكن اول مانوصل كيف ولا نحجز وانا قاعد في ليبيا با النت والله السفر قريب وانا خايف خاصه ان معاي اطفال صغار وشكرا

والله ياريت تفيدوني بمعلومات علي الجو غادي في ملبورن توا في شهر 8 صقع ولي دافي لان معاي اطفال وندير احتياطي وبنسال علي التخفيضات كويسه وعندهم تخفيضات في الملابس وغيرها وشكرا

السلام عليكم
بالنسبة ليك انت باعتبارك متزوج فافضل شي تعمله انك تحجز السكن من ليبيا اما عن طريق الجامعة اللي انت تبي تقرا فيها او عن طريق احد المكاتب الموثوق فيها, بالنسبة للخيار الاول كل جامعة عندها سكن وهذا السكن انواع هناك السكن المؤقت والسكن الدائم والسكن مع عائلة المهم انت حاليا تختار السكن المؤقت واتوضح لهم ان معاك عائلة, الميزة هنا انك تكون قريب من الجامعة ومن العائلة او بعدين انت تقرر تستمر في نفس السكن والا تغير المهم لما توصل تلقى وين تسكن بعدين في حاجة ثانية كل جامعة تجي للمطار تستقبل طلابها و اتوصلهمللسكن بلاش بس لازم تعطيهم علم بتاريخ وساعة وصولك وعادا يكون في الموقع الرسمي للجامعة صفحة خاصة بالطلبة اللي قريب يوصلوا فيها نمودج اتعبيه اون لاين وهذا هو النمودج اللي تعلمهم فيه بالمعلومات المطلوبة باش ايجوك للمطار وعادا ايردو عليك يالايميل ويقولولك تم تاكيد الاستقبال في المطار. بالنسبة للخيار الثاني اني ننصحك تمشي للدكتور عبدالسلام النويصري هذا راجل طيب وعنده وكالة خاصة بالطلبة الدارسين باستراليا و اطلب منه انك تبي سكن على العموم هو راح ينصحك وهو شهادة لوجه الله راجل طيب او ينصحك لوجه الله المهم هوا مكتبه في سوق بوابة الاندلس بحي الاندلس الدور الثاني وهذ رقمه 0922307021. على العموم اني طالب ليبي وموجود الان في ملبورون وبالنسبة للاسعار والمنحة شوف كل شي يعتمد على صرقك انت لكن اني من وجهة نظري بصراحة المنحة كافية وزيادة.
مع تحيات
الشيباني

اخي العزيز
أنا مستعد لإستقبالك في مطار مالبورن وتنسيق أمور السكن المؤقت لك وكذلك مساعدتك في الأمور الأوليه عند بداية وصولك حسب إستطاعتي وقدرتي حسب ما هو مبين في مشاركتي السابقة مرحبا بكم في مدينة مالبورن / ولاية فيكتوريا .... على الرابط

[ندعوك للتسجيل في المنتدى أو التعريف بنفسك لمعاينة هذا الرابط]

فأذا كنت ترغب في ذلك فأمل منك مراسلتي على الخاص
توصل بسلامة الله