أهم الأشياء المطلوب إحضارها من ليبيا

السلام عليكم
اني ارى ان تحضروا قدر ما تستطيعوا خاصة احتياجاتكم في الاشهر الاولى حيث انكم في هذه الفترة لا تعرفوا الاسواق اللي اثمانها معقلولة وفي نفس الوقت محتاجين لها في ذلك الوقت مثل (الحداد وملابس الصوف والطنحرة بالكسكاس و.......وكل ماتقدر تجيبه)
صحيح الاسعار احيانا الى حد ما معقولة لكن يبقى الفرق في السعر في ليبيا وهنا كبير جدا مايزيد عن الضعف.
وكذلك الاحذية هنا الاحذة الصينية اللي عندنا 12 دينار ب 40 دولار والحذاء الرياضي اقل شئ 40 دولار لذا انصح بجلب حذاء رياضي نوعية كويسة وحذائان نوعية كويسة تركية او ايطالية لان المشي على الرجلين هلبة هني واللي يجيبلك حذاء ايطالي غادي يادوب يجيبلك حذاء صيني هني .
انصح بجلب بطارية وشاحن احتياط لموبيلك ومتعباش تشري موبايل من هني.وكل اكسسوارات الكمبيوتر مثل السماعات والفلاش "الاسعار هنا لا تقارن بليبيا".
وبالنسبة للقاموس فتحتاج قاموس الكتروني ناطق لانه مهم اثناء الحصة لعد توفر وقت للبحث وكذلك تحتاج الى قاموس انجليزي انجليزي لانك هنا تحتاج الى معرفة التعريف باللغة الانجليزية وأمثلة.
واخيرا ملابس الاطفال هنا في ملابس اطفال باسعار معقولة ولكن تبقى لا تضاهي جودة الملابس السورية في ليبيا فأغلبها صييييييييييني والجودة العالية غالية.
وانشاء اله منسيتش شي
وشكرا

السلام عليكم نرجو من مدير المنتدي التأكيد علي بعض الاشياء حيث ان بعض الاعضاء يقولي الاسعار غالي ويقول جيب معاك كل شيء حتي نستغرب ماهو المطلوب نجيب معي ونرجو الرد منك ياستاد الاني بنجي انشاء الله شهر 8 السلام عليكم

المشكلة الوحيدة هى الوزن الزائد وخاصة البطاطين والاشياء الثقيلة

المشكلة الوحيدة هى الوزن الزائد وخاصة البطاطين والاشياء الثقيلة

السلام عليكم ورحمة الله وبركاته
والله ياختي الكريمة ادا انتي جايه الى ملبورن فانا انصحك انك ماتجيبي شئ معاك لانه في كل شئ وقريب جدا في اسعارها من ليبياسواء البطاطين او ادوات المطبخ فموجود كل شئ جيبي معاك بطاطين اخفاف اللي احني انقولولهم (ابطاطين المكيف) لاول ماتوصلي فقط والباقي كله موجود مع فرص الاختيار
خودي كلام اكيد اني مشيت لمجموعة من المولات والمحلات اللي القيته نفس اسعار ليبيا يعني متعبيش روحك بالتكركير الزايد

مشكورة يا ام محمد بس الواحد يتلخبط ومعاش يعرف شن يرفع معاه لما يقرا مشاركات الاعضاء بهذا الخصوص ... وللاسف انى ماشية الى سدنى بعون الله تعالى بس مازال شوى

اااخواني هل احضر طنجرة بالكسكاس ام اجدها هناك لااني عانيت مسبقا في بعض الدول من الحصول عليها

على حسب ماقريت فى المشاركات انك الافضل ترفعها معاك

بارك الله فيكم والله يوفقكم

السلام عليكم
وفقا لتجربتى الشخصيه ان اهم شى لازم اتجيبه هو الطنجره والكسكاس الباقى اعتقد انه متوفر انشاء الله

براد الشاي يا اخوان

ينصح باحضار عربة اظفال و المهم اتكون من النوع المتين و الجيد لانه لانواع الجيده غاليه جدا هنا حيث تصل العربه الجيده هنا الى حوالى 200- 300$

السلام عليكم ........
ياأخون انا نبي نسأل عن البهارات والتمر والكسكسي احد الاخوان قال موجودة ومتوفرة في استراليا .....سؤالي هل متوفرة في مدينة بيرث ايضا وفي اي مكان ممكن نلقاها بالتحديد((قصدي عنوان السوق في بيرث لو موجود)) لاني جاي قريب لبيرث انشالله .....افيدوني افادكم الله ..... وبارك الله في كل من اعطي نصيحة او معلومة مفيدة وجعله في ميزان حسناته.... اللهم آمين

يقول الرسول الكريم من لم يشكر الناس لم يشكر الله جعل لله كل كلمة نصح منكم فى موازين حسناتكم واود التاكيد على الاوراق او المستندات الى ممكن الواحد يستحقهن غادى زى كتيب العايلة والجواز وباقى الاوراق شن هنا يعنى بالضبط بوركتم اخوانى

السلام عليكم ورحمة الله وبركاته

شكرا لك أخى أولاد صولبه على التوضيح ، حبيت فقط اضيف أن المكتب الشعبي يطلب في صورة من كتيب العائلة او عقد الزواج لغرض أضافة مولود جديد الى جواز السفر.

الف شكر علي النصائح وفقك اللة