مطار دبي وكيفية التنقل فيه

السلام عليكم

باعتبار نسبة كبيرة جدا من كل الطلبة راح تمر على دبي تراتزيت ................... نحاول قدر المستطاع نتفكر مطار دبي :
أولاً صح هو تحفة فنية وكبير ، بس مش لدرجة التخوف انك تضيع فيه وما تحلقش على الطيارة . وعموماً نتوكلوا على الله في سرد الخطوات :
1) وأنت طالع من مطار طرابلس بإذن الله ولما توزن ويعطوك تذاكر الصعود راح يعطوك تذكرتين صعود ( الأولى طرابلس / دبي ، والثانية دبي / مدينتك في استراليا ) الثانية تلقى فيها كلمة (gate ) وجنبها رقم من 3 خانات هذا رقم البوابة اللي المفروض توقف عندها في مطار دبي لما تبدأ في إجراءات الصعود للطيارة الثانية .
2) إن شاء الله وأنت في الطيارة لما قريب توصل لمطار دبي أسأل المضيفة أو المضيف ( أنا ماشي لأستراليا ونازل في دبي ترانزيت من وين نمشي ، وان شاء الله راح يخبروك على بداية الطريق ) . وهم في العادة يتكلموا بالإنجليزي بس أسال بالك تلقى حد منهم يتكلم العربية ، وأن شاء الله بمجرد ما تطلع من الطيارة وتبدأ في ممر مطار دبي انتبه لليافطات وعادة تكون بالانجليزي عبارات الترانزيت .
3) وبمجرد ما تحير أسأل أول حد يقابلك بأنك ترانزيت وتبي توصل السوق الحرة ( مكان انتظار الترانزيت للرحلات الدولية ) .
4) ان شاء الله نقولوا وصلت للسوق الحرة تلقى يافظات علوية متدلية من السقف عليها الاتجاهات وتوضيح الممرات وأرقام البوابات بالعربي والإنجليزي ولو عارف رقم البوابة متاعك تمشي جهتها طول .

[ندعوك للتسجيل في المنتدى أو التعريف بنفسك لمعاينة هذا الرابط]

5) لو ما عرفتش البوابة تلقى لوحات الكترونية كبيرة فيها رقم الرحلة وساعة المغادرة ورقم البوابة والوجهة تقدر تشوف رقم رحلتك وبوابتك من خلالها .

[ندعوك للتسجيل في المنتدى أو التعريف بنفسك لمعاينة هذا الرابط]

6) خلاص تسكرت قدامك وما عرفتش البوابة متاعك وين تسأل أي واحد يقابلك أو تدخل أو محل أو أول شرطي وتقوله نبي الاستعلامات (information)، وفي الاستعلامات وأساله يتكلم العربية أو لا ( مرات تلقى حد يتكلم العربية ) أسأل عن بيانات رحلتك ويستحسن تطلع له تذكرتك وأسأله الساعة كم لازم تكون قدام البوابة للبدء في إجراءات الصعود .
7) خلاص عرفت طريقك وين ، كلم متاع الاستعلامات من وين تشرى كرت الاتصال ، راح ينعت لك المكان ، وأن شاء الله تشري الكرت وتكلم أهلك وتطمئنهم من الماكينة ( عن نفسي شريت كرت شركة اتصالات بـ9 دولار وزي ما قلت لكم كفي ووفي وكلمت أكثر من شخص ).
وبعدها تمشي وتدور بين محلات التصريف وتحويل العملة وحول من الدولار الأمريكي للدولار الاسترالي حسب حاجتك لبداية الوصول ( وتقدر تصرف لما توصل لمدينتك في استراليا ) .
9) وتوا كان بتدير دورة في السوق الحرة والمطار باهي ، وكان بتراجي قدام بوابة الإجراءات باهي .

ودمتم في رعاية الله

السلام عليكم
منور زرقون على هذا السرد

وبالتوفيق

الله يرحم ولديك

الفيزا امتاع استراليا ان شاء الله ملتي يا جماعة شور. انا سألت في القنصلية في طرابلس وقالولي انها ملتي يعني نقدر نمشي ونرجع امتى مانبي. بس هل فيه حد يقدر ايأكد الكلام هذا.؟ شكرا!

نعم يا خوي تقدر تطلع وترد مليووووووووووووووووووووووووووووووون مرة عادي طالما فيزتك صلاحيتها سارية .... فكن مطمئن وواثق وربي يوفقك

شكرا أخ زرقون على التوضيح الرائع الذي نحن فعلا في حاجة له. بارك الله فيك.