ارائكم حول الاستعداد للسفر

السلام عليكم
اولا اني عضوة جديدة معاكم ونشكر كل الاعضاء بهذا المنتدى المفيد جدا.
ومنبيش نطول عليكم الدوة اني مسافرة بعد اسبوعين لمالبورن ونبي نقاشو مع الاخوة والاخوات اللي سافرو الى استراليا قبلنا شنو ينصحونا احني الجايين نرفعو معانا وهل هما نسو حاجات ماجابوهاش وطلعت مهمة وفقدوها او رفعو حاجات ولقوها مش مفيدة وهذا طبعا على صعيد كله ( ملابس ، لوازم البيت والمطبخ، بهارات ....الخ)
لأن في ناس قالولي جيبي كل شئ معاك خاصة حوايج الاطفال غالية
وفي ناس قالولي متجيبي شي كله متوفر حتى الكسكاس اللي هو الكسكاس متوفر عندهم.




والحاة حلوة بس نفهمها

السلام عليكم
وتوصلي ملبورن بالسلامه
الموضوع مش موضوع ان حاجه نسيناها وطلعت مهمه لان كل شي موجود هنا في ملبورن
غير اللي تبي وبالجوده اللي تبي وعلى قيس افلوسك

لكن انت اللي تقدري عليها تجيبيها جيبها وخاصة اللابتوب انا ننصحك تجيبيه معاك من ليبيا

لان هنا بصدق غاليات لكن في ليبيا تدور براحتك والمواصفات اللي تبيهن
طبعا الكسكاس جيبيه معاك مع انه في هنا لكن مش زي متاعنا

وبما انك جايه لملبورن ولو مازال فاضل عندك وزن جيبي معاك بطاطين مع انهن متوفرات هنا لكن في ليبيا تختاري اللي تبيها وباقل سعر يعني في ليبيا ارخص  

والباقي كيف ما اسلفت اللي تقدري تجيبها جيبيها
والامور في ملبورن ستكون ان شاء الله احسن مما تتوقعين لانها مدينه مرييييييييحه جدا وكل شي متوفر

سلام

شكراً على الرد لكن هو في حد عنده معلومة عن الوزن المسموح به

السلام عليكم
الوزن المسموح لكل تذكره يختلف على حسب الدرجه وعلى حسب شركة الطيران
لكن بالنسبه للاماراتيه فالوزن المسموح به هو 30كجم للتذكره على الدرجه السياحيه
و40 كجم للتذكره على درجة رجال الاعمال
وكذلك عندك وزن حوالي 10 كجم او اقل بقليل للتذكره تصحبيه معك لمقصورة الطائره بحيث يمكن استغلالها للابتوب واحتياجات الرحله وخاصة اذا كان معك اطفال

شكرا على مساعدتنا وعلى الردود

اخوتي الكرام لدي استفسار بخصوص الحقائب فكيف لي ان أزنها قبل الوصول للمطار (مطار طرابلس الدولي)
ولكم الشكر

[ندعوك للتسجيل في المنتدى أو التعريف بنفسك لمعاينة هذه الصورة]


هذا الميزان تشريه وتزني بيه الشنط
وهو الطريقة الافضل والاحسن والاسهل لوزن الشنط
وهو متوفر في ليبيا

أيظا بإمكانك الذهاب لأول محل لطحن الحبوب والأعلاف أو لبيع التوابل والباقولايات
يوجد عندهم ميزان تستطيع وزن الحقائب هناك