والان من ولونغونغ

السلام عليكم انا الان في ولونغونغ اول ما وصلت مطار سدني استقبلتني عائلة بعتث لي رسالة قبل ما نسافر بيوم وعطيتهم رقم الرحلة والقيت الشيخة اني تستنى فيا في الاستقبال وكانت الرحلة من دبي لسدني اريح من الرحلة من طرابلس لدبي والله ما تقولش 13 ساعة فيه وسائل تسلية واجدة بكل وطائرة البوينغ العملاقة ما تخليك تحس لا بالاقلاع ولا بالهبوط يعني الحقيقة الله يسامح الخطوط الاماراتية الحق يقال والوجبات والعصاير في الطائرة ما تنقطعش بكل ,,,,,,,,,
عالعموم انا توا بنرقد وبكرة لما نكمل اجراءاتي رح نحكيللكم كل شي بالتفصيل الممل ..... ادعولنا بالخير بس
مع خالص تحياتي وشكرا
طارق الحطماني

السلام عليكم
الحمد الله على السلامة
عندي سؤال صغيرون عالسريع ......... يركزوا الخطوط الإماراتية على الوزن الزايد أو لا ، وكم الوزن المسموح به على السياحية بالضبط

الحمد الله ع السلامة طارق ربي يوفقك ان شاء الله

السلام عليكم
الف الحمد لله على سلامة الوصول
وان شاء الله بالتوفيق

سامحني خوي زرقون لكن هدي النوضة . بالنسبة للوزن الوزن في ليبيا وما يدوروش فيه واجد معايا واحد كان وزن شنطته 33 كيلو قالوله عادي والوزن المسموح بيه عالسياحية 30 كيلووشنطتك مش حتشوفها من طرابلس الى سدني يعني تستلمها في سدني
واوعك تجيب اكل معاك مع انهم طيبين لكن مش حتدخله معاك فيه واحد جايب زميته معاه ومسكين حتى كلمة انجليزية ما يعرفها وكنت انا موجود وحاولت معاهم قالولي ممنوع اي منتج غدائي يخش فخداها الشرطي في المطار وحكيتله كيف ياكلو فيها وشكلهم زمتوها وكلوها
وللحديث بقية

الحمد لله علي سلامتك اخي طارق وانشالله بالتوفيق وسؤالي هو عن هل طلبت منك السي او اي في مطار سدني او دبي يعني انا قبولي الاول ‏منتهي الصلاحية ولما طلبت التجديد من الجامعة قالو بامكانك السفرحتي بدون سي او اي والرحلة هذا الاسبوع انشاالله

السلام عليكم اطمن ياخ المبروك مايطلبش منك حد السي او اي بس يشوفو تاشيرتك وبعدين اجراءات المطار في سيدني ساهلة ودبي مايدورك حد لانك ترانزيت ماليهمش علاقة بيك

Actually the experience is different between the students
for example the y wanted my offer letter and CoE in Dubai before I went up to the plane
 

السلام عليكم ورحمة الله وبركاته
تحية طيبة وبعد
الحمد الله على سلامتك و وفقك الله في دراستك
انا في نفس الجامعة ولونغونغ في تخصص الكهرباء وبداية الدراسة يوم 28/6 و انا مازلت في ليبيا من سكان مصراته اريد منك استفسار حول السكن مع العائلة و كيفية الحصول علية و كم تبلغ التكاليف على العلم بأن التفويض الخاص بي موجد عندي انا من تفويض 9 امل منكم المساعد
وشكرا على حسن تعاونك
معك : عمر طرينبة من مصراته

السلام عليكم
اولا بالنسبة للاخ المبروك ما فيش حد طلب مني السي او اي ابدا .
وبالنسبة للاخ طرينبة انا قمت بمراسلة جميع مواقع البحث عن السكن مع عائلة في استراليا لمدة طويلة بيش حصلت عزوز ردت عليا , وبعد طولت عليها يعني تاجل سفري حصلت طالبة تايلندية وسكنت معاها , لكن هالعزوز قعدت اتدورلي في عائلة لمدة اكثر من 3 اسابيع لعند ما حصلتلي عزوز اخرى صاحبتها وهذي استقبلتني في المطار لكن مشكلتها انها بعيدة واجد عن الجامعة لكن قاعدة افضل من تشحوير الفنادق وهالعزوز طلبت 1120 دولار لمدة 4 اسابيع لكن ساكنة في مكان قطعة من الجنة ,
المهم يا خوي طرينبة انا الايام الجاية رح ندور عن عايلة قريبة للجامعة ورح نحكيلك عن كل التفاصيل ,

واي خدمة من ولونغونغ تفضلو على حد الجهد
مع تحياتي

السلام عليك اخي طارق والحمد لله على سلامة وصولك واود ان اهنيك على روح المساعدة اللي عندك والله فيك الخير اللي بعد ماوصلت مازلت تساعد في اخوانك فانت اكيد كنت تعلم اننا كل معلومة نراها مهمة خدا فلك مني كل الشكر في غيرك تعبنا كل يوم رسائل ومواضيع ولما وصل الى استراليا ما عاد دخل المنتدى فلك كل الشكر

مشكور أخي طارق وبارك الله فيك علي كل ما تبدله للطلبة من توفير المعلومات والتي تعتبر مهمة وخاصة للطالب المقبل للسفر وأهنيك علي روح المساعدة والتعاون وربي يوفقك ويعطيك
وأتمني من الطلبة ان يتخدوك أسوة لهم فكما أخدوا من هذا المنتدي فيجب عليهم رد ولو جزء قليل منه
وجزاك الله خير وفقك في الدراسة وتحية مني لك

الحمدلله على السلامة أخي طارق

السلام عليكم
اولا بارك الله فيكم على الدعوات الطيبة وثانيا استراليا بلد رائع والناس هنا تقول مسلمين في معاملتهم , وانا هاليومين اللي فاتن شادهن سياحة وراحة لانها عطلة هنا بخت . لكن كل تاخيرة فيها خيرة طبعا الا توخيرة الكبش , واي خدمة انا حاضر على حسب الجهد
وربي ما يحشمنا معاكم
مع تحياتي

" إلا توخيرة الكبش "

اولا السلام عليكم
وثانيا مشكورين على مروركم الطيب والى الاخ اولاد صولبة العزوز يا ريتها تنف هذي ديمة بشيشتها ديمة الكاس فل لكن عزوز مش عادية بكل وين نبي توصلني وهدرازة مية مية وناشطة العيب الوحيد انها ساكنة بعيد عن الجامعة بس , وبالنسبة للسكن يا اخوان اللي جاي او بيجي قريب لولونغونغ لازم يخبرني ممكن نقدر نساعده على حسب القدرة مع اني مازال ما حصلت سكن لنفسي لكن المدينة حلوة ومنظمة جدا وناسها اطيب من العرب بوااااجد على الاقل لما يفوت من جنبك اي شخص يبتسم في وجهك مع انه اول مرة يشوفك ( لو كان عندنا يقولو من وين هالغريب وزعما شن عنده هنا وشن جاي يدير )
وامس مشيت فتحت حساب في المصرف اجراء سهل جدا ترفع معاك جواز السفر بس واليوم بعتث اوراقي للمكتب الشعبي ولما يخلصوني نقوللكم انشالله .
وبالنسبة لليبيين اللي هنا الحقيقة رافعين الراس على قد ما سمعت من اخواننا الكويتيين والسعوديين مع اني ما شفتش اي ليبي لحد الان . وبالنسبة لداخل المدينة ما تقل هم المواصلات لان فيه الباص المجاني يلف المدينة كلها لذلك يجب التركيز على السكن في السنتر . مع انك تقدر تمشي كيلوات في استراليا من غير ما تحس بروحك
عالعموم ما نطول عليكم
تقبلو تحياتي وخالص شكري واحترامي
وللحديث بقية

سلام الله عليك و حفظك و رعاك و بارك فيك
مشكور أخي طارق علي كل ما تبدله و انا بانتظار اي معلومة منك
شكرا جدا على حسن تعاماكم

السلام عليكم
مشكور يااخى طارق على طلبك المساعدة لجميع

واهتمامك والرد علينا
وفقكالله ورعاك

السلام عليكم ورحمة الله وبركاته احنيه قاعديين ونوفرو المشورة اللي نقدرو عليها ما راح نبخلو على حد .....................

السلام عليكم ورحمة الله وبركاته
واخيرا اليوم فتحت حسابي المصرفي ولقيت المنحة نازلة والحمد لله توا الواحد يعتبر طالب موفد ...
لكن ما عليش عندي سؤال بسيط للطلبة اللي سبقوني ... لقيت في حسابي : 7622.28$ فهل هذا يعني انهم عطوني سلفة والا شنو ياريت اللي عنده معلومة يخبرني.
وتقبلو تحياتي

السلام عليكم
نعم اخي , هو مرتب شهر و شهرين سلفة.
ربي يوفقك

السلام عليكم

مافيش حد يا جماعة يدرس في مالبورن جامعة سوينبيرن ؟؟؟
ارجو منكم المساعدة
تقبلوا احترامي

اود الاستفسار عن متى يمكنك المطالبة بمنحة شراء الحاسوب ؟؟؟؟؟؟

وشكرا